शेतकर्‍याने अंगावर डिझेल ओतून आत्महत्या करण्याचा प्रयत्न..
मंगळवेढा/प्रतिनिधी
आंधळगांव ते मंगळवेढा दरम्यान राष्ट्रीय महामार्गाचे काम सुरु आहे.या राष्ट्रीय महामार्गालगत असलेल्या जमिनी शासनाने संपादित केल्या आहेत. मात्र संबंधित शेतकर्‍यांना आर्थिक मोबदला अदयापही मिळाला नाही. संबंधित ठेकेदाराने पोलिस फोर्स घेवून दांडगाईने सदर शेतकर्‍याच्या शेतातून रस्ता सुरु करण्याचा प्रयत्न करीत असताना तानाजी प्रभू वाकडे या शेतकर्‍याने बुधवारी सकाळी 11.30 वा. ट्रॅक्टरमधील डिझेल काढून अंगावर ओतून आत्महत्या करण्याचा प्रयत्न करीत असताना उपस्थित पोलिसांनी त्याला प्रतिबंध केल्याने पुढील अनर्थ टळला.
मंगळवेढा येथील एका काझी नामक व्यक्तीने गणेशवाडी ते माचणूर इथपर्यंत रस्त्यालगत असणारी जमिन माझी असल्याचा अजब दावा केला आहे.त्यामुळे शेतकर्‍यांना प्रांताधिकारी पैसे वाटप करण्यात आकडता हात घेत असल्याचा आरोप शेतकरी वर्गातून होत आहे.जमिनीचा मोबदला न देताच पोलिस बंदोबस्तात राष्ट्रीय महामार्गाचे काम सुरु केले आहे.शेतकर्‍यांना त्यांच्या जमिनीचा मोबदला मिळणे अपेक्षित आहे. मात्र प्रांताधिकारी उदयसिंह भोसले हे काझीच्या अजब दाव्यामुळे शेतकर्‍यांना पैसे देण्यास तयार नाहीत. तर दुसरीकडे ठेकेदार काम थांबविण्याऐवजी पोलिस फोर्स घेवून कामे सुरु करीत असल्याने शेतकरी वर्गातून संतापजनक प्रतिक्रिया उमटत आहेत. प्रत्येक ठिकाणी शेतकरी व ठेकेदार यांच्यामध्ये वाद घडत आहे.
